Hugsihugsihugs…

Eins og þið væntanlega hafið giskað á, þá hef ég nú ekkert verið að brillera. Var alvarlega að íhuga að eyða bara blogginu og hætta að eyða tíma mínum í þessa vitleysu, fannst ég bara algjör aumingi og gjörsamlega misheppnuð. Er nú aðeins jákvæðari núna, en eins og ég segi, þá er mér ekkert að ganga vel. Er búin að vera að hugsa heilmikið um hvernig ég eigi að gera þetta. Ein hugmyndin var að byrja bara að einbeita mér að ræktinni og koma mér allavegana í betra form. Finnst það ágæt hugmynd. Veit líka að þegar ég er dugleg í ræktinni þá kemur mataræðið meira sjálfkrafa. En ég meika ekki kolvetnissnauða aftur, er alveg búin að komast að því. Það virkar einhvernvegin ekki að vera á kolvetnissnauðu og vera samt alltaf að stelast í brauð og pasta, þá fara kaloríurnar hratt upp… virkar ekki saman. Þannig að ég ætla bara aftur að huga meira að svona almennu, hollu mataræði. Ætla að reyna að vera ógeðslega dugleg næstu vikuna og sjá hvernig gengur.

Oooooooh!!!

Jújú, ég fór í ræktina í gær og stóð mig vel í mataræðinu þar til ég fór í saumó. Byrjaði svo sem vel, en stóðast síðan ekki mátið og fékk mér smá skyrtertu, smá nachos og smá nammi. Alls ekkert mikið, en samt greinilega nóg til að klúðra kolvetnissnauða dæminu og bæta á mig 2 kg aftur. Þar með rifjaðist það upp fyrir mér hvað var leiðinlegast við þetta kolvetnissnauða fæði, það eru þessi 2 platkíló eða vatnskíló sem fara strax og maður fer á kolvetnissnautt, en koma líka strax aftur um leið og líkaminn fær nóg af kolvetni til að byggja upp forða. Þá bindur hann nefinlega vatn við kolvetnið til að geyma það, sem eru einmitt ca 2 kg. Steig á vigt í morgun og langaði hálfpartinn til að stökkva bara út um gluggann. Ætla samt að halda eitthvað áfram í þessu kolvetnissnauða.

En hey, ég fór í ræktina.

Enn að strögglast

Mér tekst þetta enn sem komið er, samt erfitt :S Er alveg búin að vera að reyna að finna allar afsakanir í hausnum á mér til að fara ekki í ræktina, en ætla ekki að láta undir og ætla bara að drífa mig um leið og iPodinn minn er búinn að hlaðast. Mataræðið gengur alveg ágætlega. Ég er reyndar ekki alveg ofurströng á kolvetnið eins og ég var í denn, en reyni samt að halda því í lágmarki, vil allavegana vera undir 100 grömmum á dag og helst vel það. Er reyndar að fara í saumó í kvöld, en verð bara að finna eitthvað sem ég get borðað með góðri samvisku. Langar að vera grönn, langar að vera grönn, ætla að verða grönn!!!

So far so good

En mér finnst þetta samt erfitt :S Ég finn það alveg, mig langar í eitthvað sætt og éta óhollustu og allt þetta. En ég hem mig, allavegana enn sem komið er. Ekki eru nú margir dagar liðnir svo sem.

Mataræðið var fínt í gær, endaði í ca 1250 hitaeiningum og 36 grömm kolvetni. Vonandi verður dagurinn í dag bara svipaður. Svo á morgun ætla ég að drífa mig í ræktina aftur, alveg kominn tími á það. Ferlegt að hugsa til þess að maður sé búinn að éta á sig a.m.k. 10 kg aftur síðan um páskana. Bjakk bara Mig langar svo að verða grönn aftur, óþolandi að þetta skuli vera svona erfitt.

Jæja, ég stefni nú samt á að massa þetta bara, veit ég get þetta, þarf bara staðfestuna.

Þá byrjar ballið

Vaknaði samt allt of seint í morgun þannig að ég náði ekki að fá mér egg og beikon. En fékk mér bara ostbita og skinkusneið. Sjáum svo hvernig þetta gengur. Hef ekki alveg tíma fyrir ræktina strax, er að græja unglinginn fyrir Mallorcaferð sem hún er að fara í með pabba sínum. Hún fer á miðvikudagsmorguninn. Þá verð ég algjörlega barnlaus hér í tvær vikur, svei mér þá. Jæja, nenni ekki að blogga, bara láta vita af mér smá

Eins og alkinn fyrir afvötnun

Það er góð lýsing á mér. Nú er ég búin að ákveða að taka þetta með trompi eftir helgi og byrja þá á kolvetnissnauða fæðinu. Nú um helgina er ég búin að sukka all verulega, detta í það og úða svo í mig pizzu og sælgæti. En ég er að birgja mig upp af heppilegu fæði í ísskápinn og svo byrja ég á mánudag. Þá verður líka gert plan fyrir ræktina. OG SPARK Í RASS Á MÉR OG YKKUR.

Vonlaus og óánægð

Já, ég hef verið í þeim pakka undanfarið. Mér gengur ekkert að koma mér almennilega af stað. Oft byrja ég daginn með góðu hugarfari, stend mig vel fyrri hluta dags og svo þegar ég kem heim úr vinnunni klúðra ég öllu. Ég bara veit ekki alveg hvað ég á að gera. Eins kem ég mér ekki af stað í ræktina og er svo sannarlega ekkert léttari en síðast þegar ég bloggaði hér, eflaust bara þyngri.

En samt vil ég ekki gefast upp, ég held alltaf að mér hljóti að takast þetta á endanum. Nú ætla ég að fara aftur í kolvetnasnauða mataræðið í smá tíma. Ja, best að setja bara ákveðið tímamarkmið… segjum kolvetnasnautt fæði í 4 vikur og sjáum hverju það skilar. Svo fer ég nú bráðum að fara í sumarfrí og þar sem ég er ekkert að fara í neitt ferðalag þá leggst það mun betur í mig átakslega séð en áður. Ætti að geta haldið rútínunni að mestu… en þá er náttúrulega forsendan að koma sér í rútínu fyrst.

Jæja, frí í dag. Ég er reyndar drullusyfjuð og er að hugsa um að leggja mig í klukkutíma og drulla mér svo til að taka aðeins til hér heima. Kannski ætti ég svo að reyna að koma mér í ræktina á eftir.

Alveg að koma helgi

Dagurinn í gær gekk vel fyrri part dags, en seinni hlutann hallaði vel undir fæti. Það var uppskeruhátíð hjá púkunum mínum í handboltanum og þar var þetta fína hlaðborð og ég stóðst ekki alveg freistingarnar. Síðan seinna um kvöldið fór ég á kynningu hjá vinkonu minni og úðaði í mig lakkrís… kommon, hann er bara hættulega góður. En í dag er ég aftur komin í hollustuna og stefni á að halda deginum þannig. Ekki hafði ég tíma til að fara í ræktina í gær, en vonandi næ ég að fara á eftir.

Engir magavöðvar :S

Eða kannski er ég bara tognuð í maganum. Allavegana fór ég í ræktina áðan og þegar ég ætlaði að gera magaæfingar bara gat ég það ekki því ég fékk svo mikla svona tognunarverki neðst í maganum. Ja, reyndar gerði ég einhverjar magaæfingar sem reyndu minna á akkurat þetta svæði, en þetta var voða skrýtið :S Ekki er ég beint búin að reyna mikið á kviðvöðvana undanfarið.

En jájá, mataræðið er fínt, hreyfingin fín, þannig að þetta er allt í rétta átt. Verð ég svo ekki bara að líta á það sem svo að nú hef ég alveg rosa fínan tíma til að koma mér í geggjað form fyrir brúðkaup 2009?

Dagur 2

Ó vá, rosa frumlegar fyrirsagnir, haha. En ég hef afsökun, nývöknuð eftir næturvakt og ansi mygluð.

En gærdagurinn gekk vel og ekkert óþarfa snarl á næturvaktinni. Steig á vigtina aftur núna þegar ég vaknaði og þá sýndi hún 92 kg. Smááááá munur. Þarna sjáið þið hvað sukkið getur sest á mig á no time og valdið vökvasöfnun eða einhverju, og svo getur þetta runnið af mér á no time aftur. Þ.e. sukk-kílóin. Ég held að þessi þyngd sé nærri lagi hvað ég er í raun og veru þung eftir þetta ljóta tveggja mánaða óhemjulíferni mitt undanfarið. En ég dreif mig í ræktina í gær. Tók samt ekkert ofurtíma, púlaði bara í 45 mínútur á Cross Trainernum og lét það duga í þeta sinn.

En það er mikill léttir fyrir sálina að vera komin aftur af stað, mér líður miklu betur þegar ég passa mig að borða hollt og hreyfi mig

Önnur næturvakt í nótt… stefni á að fara í ræktina aftur á eftir, en eins og er þá meika ég það ekki. Er allt of illa sofin, enda vaknaði ég rétt eftir hádegi við það að nágranninn var kominn með vélsögina út í garð að snyrta trén. Svo sem bara hið besta mál þannig séð að snyrta garðinn, en ekki gott fyrir svefninn minn. Ræni mér eyrnatöppum í vinnunni í nótt svo ég geti sofið eftir vaktina á morgun

Túrílú ;D